نبيل فياض

آخر كات-ووك المعارضات:

اتصلت بي صديقتي القديمة المتجددة من سن الفيل، أوغيت؛ لتقول بتصابي القريبات من سن اليأس: ما فيك تزورني هاليومين! أنا مسافرة ع الكاهرة [ تقصد القاهرة ]! راح أخطف إجري كم يوم وإرجع. لما بسير [ بصير ] ببيروت بفيبرلك [ من فايبر ]!

سألتها برصانة الباحثين: شو عندك بالقاهرة؟

أجابت: ما بتعريف [ تقصد: ألا تعرف ؟ ] في ديفيليه للمعاردة [ المعارضة ] السورية!

سألت: في أي أوتيل؟

أجابت وهي الخبيرة: ما بعريف [ لا أعرف ]! اتسلت [ اتصلت ] فيي جوزيان من هونيك وقالت لي ع الديفيليه! كمان خبرتني أنن عن [ في جونيه وكسروان يقولون بدل عم، عن ] يتخانقوا كرمال الأوتيل! بدن شي كلاسي وفايف ستارز!!

سألت أوغيت: لكن أنت حضرت ديفيليه للدولة قبل أيام في دمشق...

قاطعتني بسرعة: بدي كارين [ أريد أن أقارن ] بين الديفليهين!! حاسة أنو ديفيليه المعاردة [ المعارضة ] راح يكون سكسي أكتر وأب تو ديت أكتر!! الدولة تبعكون صارت أولد فاشن!!

اتصلت بي أوغيت وجوزيان من القاهرة آخر الليل! كان غريباً أن لا تفيبرا [ من فايبر ] وهما الكحتة! وكنت أستغرب أن تتصلا مباشرة بعد الديفيليه إياه.

صاحت جوزيان الخبيرة بصوت متألم ومحبط: شو هالقرف! يكركفوا الناس لعندون ويطلع ديفيليه زبالة! عاردات [ عارضات ] بيقرفوا! كلهن ختايرة من أيام أم ستي!! [ جوزيان ضربت أبواب الستين ]! قلنا معليش!! الفساتين كلها منقولة عن فساتين ديفيليه الدولة بس بطريقة كتير فولغير... إع!! الألوان باهتة قد ما مرق عليها زمن ومسحتها إيدين ومناخير وغير مناخير!! الـ...

خطفت أوغيت الهاتف من جوزيان، وصاحت: يا خيي بدهن يعملوا شي – حلو! بس ع القليلي يقولوا لنا شو القصات الجديدة اللي بدهن يقدموها. شو الألوان الجديدة اللي بدهن يقدموها!! شو الفيجن الي عندهن حتى نعرف الله وين زاتتنا!! بس هيك!! إع!

سألت الخبيرتين اللتين كانتا جميلتين: ماذا استنتجتما  من كل هذه الهمروجة؟

أجابت جوزيان: حبيبي بسراحة [ بصراحة ]!! بدهن يفرضوا مانيكاناتهن الختيارات على ديفيلات الدولة! هيدي كل القصة! مانيكانات الدولة أحلا؛ وحياة مامي أحلا! بس هيك! حسد وغيرة! هيدا رأيي!

علقت أوغيت: كمان هيدا رأيي! بسراحة [ بصراحة ] بدهن يشغلوا مانيكاناتهن بالشام لأنو بالكاهرة [ بالقاهرة ] ما إلهن شغل!! بس بدك رأيي السريح [ الصريح ]؟

أجبتها: نعم!! وبسرعة!

قالت: يودوهن على مأوى العجزة! خيي نحنا بيروت عم نشوف مريمام كلينك وجويل حاتم ولاميتا فرنجية ختيارات!! تعا شوف شو شفنا بمصر!! متل مشوار الكلاب: غبرة وقلة واجب!!

كل الأحزاب المعارضة حتى في بوركينا فاسو وترنيداد او توباغو لها برامج سياسية-اقتصادية-مجتمعية واضحة: إلا سوريا!!

البرنامج هو – إسقاط النظام وبعده الدولة ... بيد الدواعش!!

سألت أوغيت: أكلتي بصارة بمصر؟

أجابت: نو!! معدتي عم تلعي من وقت الديفيليه!

ثم صاحت: جوزيان!! عطيني حامضة...

اشترك بالنشرة البريدية

أنت هنا: Home مقالات مقالاتي آخر كات-ووك المعارضات: